ЛЕТУВАЊЕ

ЛЕТУВАЊЕ

Тоа лето жените од моето семејство ги спакуваа своите куфери  

и болките пригушени во мрзоволност  

заколнувајќи се дека никогаш нема да се вратат  

мажите останаа на праговите  

чешкајќи збунети чела и тркалезни стомаци во маици  

со џексонполоковски наслаги од претходните оброци  

изненадени од вишокот на тишина  

Тоа лето жените од моето семејство ги зедоа своите  

уредно спакувани разочарувања (секое со линија од пегла)  

меѓу нив ставија сапуни (за да мирисаат поубаво така сложени)  

внимателно ги лакираа ноктите за да не се видат трагите  

на исползувањето од сопствените осамености (колку подолг брак, толку подлабока јама)  

и ги подигнаа на потпетици своите убави, тркалезни задници  

за да скријат дека ниту една од нив повеќе не оди по земјата  

Тоа лето секоја се сети дека има возачка дозвола  

иако никогаш не седнала зад волан  

обидувајќи се да им дадат значење на своите мажи  

(гледај, сепак не можат баш сѐ!)  

Можеби само се надеваа дека на патот од точката А до точката Б  

со благо вртење на воланот на Оној Чии Рацe Некогаш Биле Свет  

ќе можат да го состават покиданото  

преку случаен разговор за пејзажот

Да го испробуваат својот глас над морската шир 

Да врзани за јарболот непречено создаваат  

а всушност  

додека во пулсирањето на вратната жила  

го чувствуваат зародишот  

на ненаправениот чекор  

заминале  

да врескаат од местото  

помеѓу нозете  

во надеж  

прек(р)асна надеж  

дека урликот  

ќе привлече глутница.

МЕЃУ СПЕКУЛУМОТ И ГРЛОТО НА МАТКАТА

Таму  

Меѓу спекулумот и грлото на матката  

Сигурно засолниште за сè она  

Што зборовите не го опфатиле