Луди се уметниците, фанатиците и верниците.
Луди се пијаниците, заблудените и самотниците.
Луди се утопистите, филозофите и сонувачите.
Луди се револуционерите, реалистите и закрепнувачите.
Луди се мајките, луди и татковците,
луди се синовите и ќерките,
луди се мртовците.
Луди се питачите и депресивците,
луди се богаташите и опортунистите.
Луди се лудаците, а полуди докторите.
Луди се психозите, апчињата и дрогите.
Луди се квечерините, луди се и зорите,
луди се виулиците, дождовите, пороите.
Луди се мислите, чувствата и зборовите.
Луди се другарите, љубовниците, огновите.
Луди се гордите затворени во кафезот,
а уште полуди се оние што доаѓаат да ги посетат.
Луди се курвите, мафијашите, политичарите.
Луди се овците, кучињата, овчарите.
Луди се мајмуните, светците и вонземјаните.
Луд е човекот – лудо претсказание.
Лудо е и лудилото,
а за здравиот разум не ни прашувај ме.
И ти си луд, драг читателу.
Ти најверојатно си полуд и од лудите.
(Од „Ново раѓање на зборот“, антологија на младата македонска поезија во изднаие на ПНВ Публикации, Скопје, 2023)
Никола Наумовски (1994, Куманово) дипломирал музичка теорија и педагогија на Универзитетот „Гоце Делчев“ во Штип. Добитник е на првата награда на конкурсот „Млади поети“ одржан во чест на 100-годишнината од раѓањето на Блаже Конески од страна на Агенцијата за млади и спорт (АМС) во 2021 година, како поет . Застапен е во првата едиција на фестивалот за европки театарки алтернативи „Штурм унд Дранк“ (Sturm und Drank) во 2021 година, на фестивалот „Литературни искри“ во Готивар, како и на поетскиот настан „100 000 Поети за промена“. Негови песни се објавени во неколку антологии. Композитор е на музичкиот проект „Синкинг фотон“ (Sinking Photon)
