секој нерв од моето тело
се грчи
во моментот на невнимание
кога на бутината
ми се спушта дланка
правејќи од мене
уште една неважна работа
која само служи за да
му даде потпора
растевме слично
на спротивните страни
од нашиот мал град
запишавме добри школи
трениравме кошарка
од часовите по глума
трчавме на англиски
одвај чекавме да
побегнеме таму
каде што нема да не познаат
љубопитните соседи
што по нас викаа
идеалните синови
мирни како девојчиња
убави и умни
ќе бидат сјајни зетови
ги храбреа нашите мајки
сите тие роднини
што не насетуваа
беа добри момци
некои велат дури и сега
бранот
врз морската шир од излижаниот тексас
додека седиме на балконот
и се допираме
само со копнеж и со голо око
пулсира
Препев од српски јазик: Сашо Огненовски
(Од поетската збирка „Бевме добри момци“, Прометеј, 2022, Нови Сад)
Студирал на Факултетот за современи уметности во Белград. Првата стихозбирка „Питоми вулкан“ ја објави со поддршка на издавачот Нова поетика во 2020 година. Збирката беше во потесниот избор за книжевната награда „Србољуб Митиќ“истата година. Учесник и еден од избраните автори на повеќе меѓународни фестивали. Неговите песни се преведени на македонски, англиски и шпански, а објавени се во различни антологии, антологии, списанија и на портали во Србија и регионот. Како дел од драмското студио „Знаци“ работеше на драмски текстови кои неколкупати беа наградувани на Фестивалот на театарски игри за деца и младинци во Белград. Втората стихозбирка „Бевме добри момци“ ја објави во 2022 година за издавачката куќа Прометеј, како дел од едицијата Река библиотека. Главен и одговорен уредник на порталот „Блудни стих“, кој како дел од електронска антологија секој месец објавува избор од регионална љубовна поезија.
